ភ្នំពេញ៖ ក្រសួងសាធារណការនិងដឹកជញ្ជូន គ្រោងធ្វើការតភ្ជាប់ការដឹកជញ្ជូនតាមផ្លូវទឹកពីទន្លេបាសាក់បុកទៅសមុទ្រខេត្តកែប បន្ទាប់ពីទទួលបានបញ្ចប់នូវការសិក្សាទៅលើផែនការមេរួច។ ទោះជាយ៉ាងណារដ្ឋមន្ត្រីក្រសួងសាធារណការមិនទាន់អាចបញ្ជាក់បានទេថាការភ្ជាប់នេះគឺដោយមានការជីកព្រែកទម្លុះទៅសមុទ្រឬយ៉ាងណានោះទេ។
នៅក្នុងពិធីបិទសន្និបាតបូកសរុបលទ្ធផលការងារឆ្នាំ២០២១ និងលើកទិសដៅការងារឆ្នាំ២០២២ នាថ្ងៃទី២៨ ខែមករា ឆ្នាំ២០២២ រដ្ឋមន្ត្រីក្រសួងសាធារណការនិងដឹកជញ្ជូនលោក ស៊ុន ចាន់ថុល លើកឡើងថាក្រសួងកំពុងពិចារណាគ្រោងនឹងធ្វើការតភ្ជាប់ខ្សែដឹកជញ្ជូនតាមផ្លូវទឹកពីកំពង់ផែទឹកសាប ទៅកំពង់ផែទឹកប្រៃដោយផ្ទាល់តែម្ដងដោយមិនចាំបាច់ឆ្លងកាត់នីតិវិធីដែលមានសព្វថ្ងៃនៅច្រកទ្វារអន្តរជាតិក្អមសំណឆ្លងកាត់វៀតណាម។
លោកបានបញ្ជាក់ថា ក្រសួងបានបញ្ចប់ការសិក្សាទៅលើផែនការមេដឹកជញ្ជូនភ្ជាប់ពីទន្លេបាសាក់ទៅសមុទ្រខេត្តកែប ព្រមទាំងបានធ្វើការរាយការណ៍ទៅកាន់នាយករដ្ឋមន្ត្រីកម្ពុជា សម្ដេចតេជោ ហ៊ុន សែន និងរដ្ឋមន្ត្រីក្រសួងមហាផ្ទៃ សម្ដេចក្រឡាហោមរួចហើយដែរ នឹងបានបន្តការសិក្សាបន្ថែមទៀតទៅលើផលប៉ះពាល់ និងទំហំនៃការចំណាយទៅលើគម្រោងមួយនេះ។
រដ្ឋមន្រ្តីក្រសួងសាធារណការរូបនេះបានបន្តថា ការតភ្ជាប់ការដឹកជញ្ជូនតាមផ្លូវទឹកពីទន្លេបាក់សាក់ ទៅកាន់ទឹកប្រៃនៃសមុទ្រខេត្តកែបនេះ គឺដើម្បីឲ្យមានការរីកចម្រើននូវវិស័យដឹកជញ្ជូនតាមផ្លូវទឹក រីឯខេត្តមួយចំនួនដូចជាខេត្តតាកែវនឹងទទួលបានផលប្រយោជន៍ល្អៗ ពីការតភ្ជាប់ខ្សែទឹកនេះ។
គួរបញ្ជាក់ថា នៅក្នុងឆ្នាំ២០២១ កំពង់ផែស្វយ័តក្រុងព្រះសីហនុមានទំនិញឆ្លងកាត់ចំនួនប្រមាណ ៦,៩លានតោន កើនឡើង ៥,៩៩% និងចំណូលសរុបមានចំនួនប្រមាណ ៣៧៣ប៊ីលានរៀល កើនឡើង ១៧,៦៤%ធៀបនឹងការអនុវត្តឆ្នាំ២០២០ ខណៈកំពង់ផែស្វយ័តភ្នំពេញមានទំនិញឆ្លងកាត់មានចំនួនប្រមាណ ៤,២លានតោន កើនឡើង ១៣,៤១% និងចំណូលសរុបមានចំនួនប្រមាណ ១៣៨ប៊ីលានរៀល កើនឡើង ១៤,៣៧% ធៀបនឹងការអនុវត្តឆ្នាំ២០២០។
ក្នុងនោះក្រសួងកំពុងអភិវឌ្ឍចំណតរណបតាមដងទន្លេមួយចំនួន ជាយុទ្ធសាស្រ្តជំរុញការដឹកជញ្ជូនតាមផ្លូវទឹក ដើម្បីបង្ខិតសេវាកម្មកំពង់ផែទៅជិតអ្នកប្រើប្រាស់ និងធ្វើឲ្យកំពង់ផែក្នុងតំបន់ មានសក្តានុពលក្នុងការគាំទ្រដល់កំណើនសេដ្ឋកិច្ចជាតិនិងកាត់បន្ថយភាពក្រីក្រ៕
